Google paditet për diskriminim gjinor

Tri gra që kanë punuar në këtë kompani, po e padisin Google-in për diskriminim në paga në baza gjinore

Praktikat e pagave të Google-it sërish në vëmendje të publikut, për arsye të gabuara.

Tri gra që kanë punuar në këtë kompani, po e padisin Google-in për diskriminim në paga në baza gjinore, përcjell albinfo.ch.

Ato thonë se Google ka qenë në dijeni për pabarazitë që ka bërë.

Sipas akuzueseve, me këtë akuzë po përfaqësohen mijëra të punësuara në Google.

Kelly Ellis, Holly Pease dhe Kelli Wisuri u larguan nga Google pasi kuptuan se kishin rroga më të ulëta se punëtorët meshkuj. Sipas akuzës, Google i veçon gratë në punë duke mos u rritur pagat, ndërse meshkujt me kualitete të barabarta nuk përballen me këto probleme.

Google, në anën tjetër ka thënë se po merret me padinë, por nuk pajtohet me akuzat.

“Nivelet e punës dhe ngritjet në pozita bëhen përmes komiteteve për punësime dhe promovime, dhe duhet të kalohen disa nivele të rishikimeve, përfshirë edhe pagat për t’u siguruar se nuk ka dallime gjinore në këto vendime”, ka thënë zëdhënësja e Google-it, Gina Sciglliano.