Qiratë e shtrenjta në Vjenë, problem kryesor për studentët

Nëse merr me qira një dhomë në vete, ajo shpesh kushton më shumë se 500 euro në muaj

Kryeqyteti i Austrisë, Vjena, për të disatën herë është shpallur si qyteti që ofron cilësinë më të lartë të jetës në botë. Por, kjo ndoshta nuk ka të bëjë edhe me banimin. Qiraja e shtrenjtë në Vjenë krahas rrogës mujore, është një temë që debatohet prej kohësh. Madje së fundmi ka pasur edhe protesta.

Kancelari aktual, Kristian Kern, gjatë fushatës zgjedhore, ka premtuar se shumë shpejt do të bëhet edhe një zgjidhje për çështjen e banimit, njofton “albinfo.ch”.

Më së vështiri me këtë problem duket se po përballen studentët, të ardhurat mujore të të cilëve janë të vogla apo kurrfare. Qiraja mund të jetë më e volitshme nëse studentët zgjedhin të banojnë në banesa të përbashkëta. Por, nëse merr me qira një dhomë në vete, ajo shpesh kushton më shumë se 500 euro në muaj, shkruan “oe24.at”.

Jeta më e shtrenjtë, afër universitetit

Banesat më të shtrenjta ndodhen afër universitetit, ndërsa banesat për rreth qarkut Mariahilfestrasse dhe Alsergrund janë me çmime më të favorshme. Çmimet e dhomave në këto pjesë mund të sillen mesatarisht deri në 480 euro në muaj.

Unioni i Studentëve të Austrisë, i shqetësuar

Për Unionin e Studentëve të Austrisë kjo çështje nuk është diçka e re, madje shumë shqetësuese. “Banesat e përbashkëta (WG –Zimmer) të cilat kushtojnë mbi 500 euro nuk janë të rralla”, ankohet Johanna Zechmeister, përfaqësuese e kryesisë së Unionit. “26 për qind e studentëve janë të prekur nga varfëria”, ka vazhduar ajo.

Megjithatë ajo është e bindur se do të bëhet një zgjidhje e kësaj çështje. “ Ne jemi të bindur se studimet nuk guxojnë të vihen pyetje për shkak të parave. Për këtë, është e domosdoshme që të këtë një hapësire jetese të përballueshme për studentët”, thotë Zechmeister.