Shtypi zviceran e vlerëson pozitivisht Unionin e imamëve shqiptarë në Zvicër

E njoftuar përmes albinfo.ch, «Le Matin Dimanche» i kushton një shkrim me qasje lavduese Unionit të Imamëve Shqiptarë në Zvicër

Imamët shqiptarë bashkohen kundër ekstremizmit, kështu nëntitullohet shkrimi i gazetares Camille Krafft në numrin e të sotshmes të « Le Matin Dimanche », javore e së dieles më e lexuar në Zvicrën romande.

Një Unioni i ri i cili lartëson dialogun ndërfetar ka parë dritën në Zvicër. Ai profilohet si një kundërpeshë e moderuar ndaj Këshillit qendror islamik të Nicholas Blancho.

Lufta kundër ekstremizmit, dialogu ndërfetar si dhe transparenca figurojnë në vend të mirë në statuset e kësaj organizate, të publikuara më 22 janar të këtij viti.

Unioni i imamëve shqiptarë të Zvicrës, i cili numëron tridhjetë anëtarë, dëshiron ta përmirësojë imazhin e islamit si dhe myslimanëve në Zvicër, të cilin e gjykon seriozisht të dëmtuar nga votimi mbi minaretë më 2009. Duke e afishuar rolin e një ambasadori, Unioni ofron një zë për shumicën e myslimanëve të Zvicrës të cilët e praktikojnë një islam të moderuar. Kryetari i saj, imami i Kreuzlingen, Rejhan Neziri, llogarit poashtu të reagohet publikisht ndaj qëndrimeve të cilësuara si esktremiste apo fanatike, thotë ai për portalin albinfo.ch.

« Është një hap me rëndësi, analizon Christophe Mottet, hulumtues në Universitetin e Lozanës. Pas votimit mbi minaretë, myslimanët e Zvicrës e kanë realizuar se duhet të organizohen. Deri këtu, ekstremistët e kanë zaptuar hapësirën. Sot, imamët bashkohen dhe pastaj, poashtu edhe komuniteti do të duhej t’i mbështesë. Mirëpo, nuk duhet harruar se në mesin e imigrantëve myslimanë ka shumë persona në gjendje ekonomike të vështirë, të cilët kanë preokupime tjera nga ajo e përfaqësimit të komunitetit ».

Për hulumtuesin në fjalë, Unioni i imamëve shqiptarë ofron një alternativë ndaj Këshillit qendror islamik zviceran të Nicholas Blancho, i cili përmes projektit të ndërtimit të një xhamie në Bernë apo hapjes të një televizioni islamik monopolizon vëmendjen e opinionit. « Rryma salafaiste në versionin e Blanchos është shumë e aftë për ta dëgjuar zërin e saj, mirëpo ajo nuk është aspak përfaqësuese e shumicës myslimane. Islami tradicional kosovarë është një islam i moderuar, i inspirimit turk. Këto vitet e fundit, ca imamë të shkolluar në Arabinë Saudite e kanë importuar një rrymë vehabite në Kosovë, mirëpo popullata nuk identifikohet me ata ».

Bashkim Iseni, drejtor i portalit albinfo.ch dhe hulumtues në Universitetin e Neuchâtel-it, analizon poashtu në mënyrë shumë pozitive lindjen e këtij Unioni : « Imamët e rinj të cilët janë në bazë të këtij projekti janë mirë të integruar në Zvicër. Ata flasin gjuhën e vendit, lexojnë gazetat, janë të afërt me popullatën. Optika e tyre është liberale. Për ata, tekstet fetare duhet të lexohen në funksion të kontekstit ku gjendemi ». Për Bashkim Iseni, dalja në shesh e Unionit të imamëve shqiptarë do të duhej të kontribojë në njohjen më të mirë të « shumicës së heshtur» të mysimanëve të Zvicrës.