Dy të vrarë dhe një i plagosur në atentatin në Lushnjë

Dy të rinj shqiptarë janë vrarë pasditen e së mërkurës në Lushnjë, në një atentat të mirëpërgatitur dhe një i tretë është plagosur rëndë.

Viktimat janë Z. Latifi, 23 vjeç dhe J. Hoxha, 22 vjeç, ndërsa pronari i lokalit, M. Xhepexhiu, 26 vjeç, është në gjendje kritike për jetën. Po ashtu lëndime të lehta ka marrë edhe një 66-vjeçar me inicialet B.T., përcjell albinfo.ch.

Dy shënjestrat e atentatit po qëndronin pranë një lokali të frekuentuar prej tyre çdo ditë ne lagjen “Loni Dhamo” në vendin e quajtur “Ura e Çeleve”.

Dëshmitarët në vendin e ngjarjes tregojnë se gjithçka ishte e përgatitur dhe nuk bëhej fjalë për një ngjarje të momentit. Lushnja, qyteti që ka vuajtur shumë nga luftërat e bandave të 1997-s, kishte kohë pa parë një ngjarje të këtij lloji.

Viktimat janë identifikuar shpejt ndërsa janë marre në pyetje dëshmitarët e ngjarjes. Ndërkohë që një makinë, e cila dyshohet se është përdorur nga autorët, është gjetur e djegur në aksin rrugor Lushnje-Berat.