Së shpejti do të kemi të bëjmë me pensionistë nga Ballkani dhe Turqia

Migrantët e moshuar janë pothuaj dy fish më të rrezikuar nga varfëria në krahasim me moshatarët e tyre zviceranë

Të ashtuquajturit “punëtorë mysafirë” me prejardhje nga Spanja dhe Italia janë bërë tanimë pensionistë. Këta emigrantë janë duke paguar çmimin e një politike të mangët, të zhvilluar në Zvicrën e asaj kohe.

Sipas një shkrimi të botuar në të përditshmen “24 heures”, emigrantët në fjalë janë më pak të shëndetshëm dhe më të prekur nga varfëria se bashkëmoshatarët e tyre zviceranë.

“24 heures” shpjegon në vijim se dikur këta emigrantë kishin ardhur vetëm për të punuar përkohësisht, por në fund, ata kanë mbetur përgjithmonë në Zvicër.

Gjatë konferencës së organizuar nga Forumi nacional “Age et migracion” (Mosha dhe migrimi) u theksua se “Zvicra ka rreth 130 000 emigrantë që kanë arritur në moshën e pensionit. Shumë prej tyre arritën gjatë viteve të pasluftës dhe kanë kontribuar në zhvillimin ekonomik të vendit tonë. Atë kohë fuqia punëtore ishte e nevojshme, por integrimi i tyre nuk ishte i paraparë. Kjo do të thotë që bashkimi familjar nuk praktikohej deri në mesin e viteve 60-ta”.

Judith Bucher, zëdhënëse e Pro Senectute-s, në një intervistë për gazetën e lartpërmendur sqaron se kjo popullatë i nënshtrohet rreziqeve të mëdha sa u përket sëmundjeve dhe aftësive të kufizuara, për shkak se ka kryer punë krahu në kushte shumë të vështira.

Ndër të tjerat J. Bücher tha se qeveria duhet të marrë parasysh këtë popullatë dhe të zhvillojë struktura përkatëse për të ndihmuar këta pleq, të cilët nuk kanë pasur fatin të gëzojnë mundësitë për integrim, ku hyn, për shembull, mësimi i gjuhës.

Zëdhënësja dha propozime konkrete. Ajo ceku shembullin e Zvicrës gjermane, ku disa shtëpi për pleq kanë krijuar sektorë për vendet e Mesdheut, me punëtorë italishtfolës si dhe ushqime italiane. Ajo shtoi se kjo tematikë duhet të trajtohet, sepse me kalimin e kohës ky numër i emigrantëve do të rritet. Në vitet e ardhshme do të bëhet fjalë “për pleq me prejardhje nga Ballkani ose Turqia”, tha Z. J.Bücher.