Facebooku me rritje enorme

(KEYSTONE/Christian Beutler)

Facebooku ka shënuar rritje enorme të të hyrave në tremujorin e tretë me 10 miliardë dollarë të fituara nga reklamat.

Kompania ka njoftuar se në këtë tremujor ka pasur përfitime prej 4.7 milionë dollarë, që paraqet rritje prej 80 për qind në krahasim me periudhën e njëjtë të vitit të shkuar.

Shefi ekzekutiv dhe themeluesi i gjigantit teknologjik, Mark Zuckerberg, u ka thënë investitorëve të vet se investimet e kompanisë në siguri tani do të prekin përfitimet, transmeton Albinfo.ch.

Kjo vjen pasi Facebook po akuzohet për lejimin e propagandave ruse në rrjete sociale gjatë fushatës presidenciale në SHBA më 2016.

Facebooku në raportin tremujorësh ka bërë të ditur se deri në fund të shtatorit ka regjistruar 2.07 miliardë përdorues aktivë në muaj, që paraqet rritje prej 16 për qind në krahasim me vitin e shkuar.