Fenomeni i “parave me fajde” në Shqipëri

Fenomeni i ‘parave me fajde’ po sjell pasoja në shoqërinë shqiptare dhe ngjarje kriminale që kanë si motiv këtë shkak.

Në muajin maj ishte rasti i fundit dhe i rrallë kur policia goditi një skemë të dhënies së parave me fajde. Një individi iu gjetën 22 vetura të cilat i mbante peng në këmbim të shumave monetare që kishte dhënë hua me interesa tepër të larta, raporton “TCH”.

Ekspertët thonë se policia nuk duhet të qëndrojë pasive karshi këtij aktiviteti të paligjshëm, përcjell albinfo.ch.

Masivizimi i dhënies së parave me fajde në mënyrë joligjore shikohet si rrezik potencial edhe nga ekspertët e ekonomisë të cilët kërkojnë që banka e Shqipërisë të analizojë situatën.

Sipas burimeve policore, individë ose grupe personash po japin para borxh me interesa të larta dhe në rast të moskthimit në kohë të huas, i marrin në këmbim pronën e cila mund të vlejë disa herë më shumë se detyrimi i marrëveshjes gojore.