Dy aksidente, dy të vdekur

Policia e Kosovës ka njoftuar se një 69-vjeçar ka vdekur si pasojë e një aksidenti që ka ndodhur të martën rreth orës 17:00 në Koshtovë të Mitrovicës. Viktima ishte këmbësori H.A., përcjell albinfo.ch.

Nga hetimet e para të bëra në vendngjarje, nga hetuesit e Njësisë së trafikut rajonal, bëhet e ditur se si shkak i aksidentit dyshohet të ketë qenë mospërshtatja e shpejtësisë me kushtet e rrugës nga ana e ngasësit të automjetit. Ndaj të dyshuarit 34-vjeçar është caktuar masa e ndalimit policor, derisa trupi i pajetë i viktimës është dërguar për obduksion.

Ndërkohë, sot një person ka humbur jetën rreth orës 07:30, në rrugën nacionale Prishtinë – Pejë, te Parku i Biznesit ne Drenas, si pasojë e një vetaksidenti. Vdekjen e ka konstatuar ekipi mjekësor në vendin e ngjarjes.

Në këtë rast tragjik është përfshirë vetëm një veturë, ndërsa rasti po hetohet nga njësitë relevante.

Policia u ka bërë thirrje të gjithë drejtuesve të automjeteve që të kenë kujdes më të shtuar gjatë drejtimit të automjeteve, sidomos tash me ndryshimin e kushteve atmosferike.