Miliarderi më i ri që e fitoi vetë pasurinë e tij

John Collison nuk ndihet rehat për emrin që ka marrë. Ai është miliarderi më i ri që ka fituar vetë pasurinë e tij.

27-vjeçari ka shkëlqyer si lider me kompaninë e tij të biznesit.

Irlandezi thotë se tani pyetet shumë se sa ka pasuri, por nuk di se çfarë të përgjigjet.

Collison është bashkëthemelues i biznesit softuerik të quajtur “Stripe”. Ai e themeloi këtë kompani me vëllanë e tij, Patrick 29-vjeçar, që është miliarderi i tretë më i ri. Evan Spiegel i Snapchatit me 27 vjet është mes dy vëllezërve.

I themeluar më 2011, “Stripe” nuk është aq i njohur sepse nuk shet gjithçka që mund të blenë klientët. Sistemet e veta softuerike i mundësojnë kompanive në botë të pranojnë më lehtë pagesat online përmes uebfaqeve të tyre. Me më shumë se 100 mijë klientë, vitin e shkuar kjo kompani pati vlerë prej 9.2 miliardë dollarësh, me Johnin dhe Patrickun që kanë secili pasuri nga 1.1 miliardë dollarë, sipas “Forbes”.

Të dy kanë lënë fakultetin. Pas përfundimit të shkollave në Britani të Madhe dhe Irlandë, ata vazhduan për të studiuar në top institucionet në SHBA. Patrick arriti me sukses të pranohej në Institutin e Teknologjisë në Massachusetts, ndërsa John u pranua dy vjet më pas në Harvard, transmeton Albinfo.ch.

Por edhe para se të regjistroheshin, të dy ishin milionerë për shkak të biznesit të ri, softuer që i mundësonte kompanive të vogla të shisnin dhe të bënin bizneslehtë përmes uebfaqeve si “eBay”.

I quajtur fillimisht “Auctomatic”, ai u shit më 2008 për pesë milionë dollarë, një vit pasi pati funksionin e parë. Më pas vëllezërit vazhduan punën duke e quajtur biznesin “Strip” e duke lënë fakultetin.

“Kur erdhëm me idenë e ‘Stripet’ shumë njerëz tashmë kishin ide të ngjashme. E vështira ishte krijimi i një produkti që njerëzit duan ta blenë dhe t’i dëgjosh ata. Por të fitosh para nga njerëzit në internet ishte ekstremisht e vështirë”, ka thënë John për BBC.

Pavarësisht shumë rivalëve, “Stripe” u rrit shpejtë dhe tani ka përkrahje edhe nga themeluesi i Teslas, Elon Musk dhe themeluesi i “Paypal” Peter Thiel.

Kjo kompani sot ka 750 punëtorë, 500 në San Francisco dhe 150 të tjerë në Evropë e rajone të tjera.