Lunaçek: Dialogu politik për veriun, i nevojshëm

Opsioni më i mirë do të ishte që ky dialog të zhvillohet ndërmjet qeverisë së Kosovës dhe serbëve lokalë të veriut të Kosovës

Raportuesja e Parlamentit Evropian për Kosovën, Ulrike Lunaçek në Prishtinë, ka theksuar se Serbia duhet të zbatojë të gjitha marrëveshjet e arritura në kuadër të dialogut me Kosovën, në të kundërtën nuk do ta marrë datën e nisjes së bisedimeve për anëtarësim në BE.

Ajo e sheh si të nevojshme nisjen e një dialogu politik për veriun e Kosovës, por pas formimit të qeverisë së re në Serbi, e cila do të dalë nga zgjedhjet e 6 majit atje.

Sipas saj, opsioni më i mirë do të ishte që ky dialog të zhvillohet ndërmjet qeverisë së Kosovës dhe serbëve lokalë të veriut të Kosovës, por në rast të nevojës, të përfshihet edhe Beogradi zyrtar.

Ndërmjetësimin e këtij dialogu, sipas eurodeputetes Lunaçek, do ta bënte Bashkimi Evropian, i cili aktualisht po ndërmjetëson edhe në dialogun teknik midis Kosovës dhe Serbisë.Lunaçek është takuar edhe me kryeparlamentarin Jakup Krasniqi, nga i cili tha se ka kërkuar përshpejtim të reformave kushtetuese dhe zgjedhore.

Vizita e Lunaçekut në Prishtinë pason miratimin e një rezolute në Parlamentin Evropian mbi Kosovën, në të cilën pos tjerash u bëhet thirrje pesë vendeve të BE-së, të cilat ende nuk e kanë njohur Kosovën, që ta bëjnë një gjë të tillë.

Rezoluta gjithashtu i bën ftesë komitetit Olimpik Ndërkombëtar që të mundësojë pjesëmarrjen e atletëve kosovarë në Lojërat Olimpike në Londër këtë vit.

Por rezoluta ka edhe detyra për autoritetet e Kosovës, në marrjen e masave ndaj përgjegjësve për mashtrimet në procesin zgjedhor dhe në shtimin e përpjekjeve në luftën kundër krimit të organizuar dhe korrupsionit.