Zvicra përfshihet në operacionin ndërkombëtar “Calibre”

I nisur në shtator 2017, operacioni ‘Calibre’ arriti kulmin me një veprim të përbashkët dyditor në datat 17-18 nëntor 2017, i koordinuar nga Qendra Operacionale e Europolit në Hagë

Mbi 135 armë zjarri dhe 7 000 municione të konfiskuara, janë disa nga rezultatet përfundimtare të operacionit ‘Calibre’, një seri veprimesh ndërkombëtare, të cilat u zhvilluan në 10 shtete anëtare të BE-së dhe në 8 vende të treta, të udhëhequr dhe koordinuar nga Britania e Madhe, si lideri i këtij aktiviteti dhe me mbështetjen e plotë të Europol dhe Frontex, shkruajnë mediat në Tiranë.

I nisur në shtator 2017, operacioni ‘Calibre’ arriti kulmin me një veprim të përbashkët dyditor në datat 17-18 nëntor 2017, i koordinuar nga Qendra Operacionale e Europolit në Hagë, gjatë së cilës u kryen kontrolle fizike, kryesisht në rajonin e Ballkanit Perëndimor.

Në këtë aksion morën pjesë Britania e Madhe, Suedia, Kroacia, Sllovenia, Gjermania, Bullgaria, Greqia, Rumania, Spanja, Hungaria, si dhe Zvicra, Shqipëria, Bosnja, Maqedonia, Serbia, Mali i Zi, Kosova, njësia ATF e SHBA-së, Europol dhe Frontex.

Gjatë këtij aksioni u arrestuan 18 persona në shtetet e Ballkanit Perëndimor për veprat penale në lidhje me armët e zjarrit dhe eksplozivët si edhe 81 individë u penguan të hynin ilegalisht në BE. Përveç kësaj, u identifikuan edhe 37 raste, të cilat kishin kaluar afatet e qëndrimit.

Në rajonin e Ballkanit Perëndimor dhe në Britaninë e Madhe u vendosën 4 zyra lëvizëse të Europol-it, duke mundësuar në kohë reale shkëmbimin e informacionit dhe duke analizuar dhe kontrolluar të dhënat e mbledhura. Në pika të ndryshme të kalimit kufitar në Ballkanin Perëndimor oficerët e kufirit gjatë kontrollove në kufi u ndihmuan edhe nga Frontex.

Operacioni ‘Calibre’ është pjesë e operacionit ‘Dragon’, i cili është i katërti event i Ditëve të Përbashkëta të Veprimit të organizuara në gjithë BE-në, që zhvillohet brenda Ciklit të Politikave të BE-së për krimin e organizuar ndërkombëtar dhe krimet e rënda, i cili u zhvillua në kuadrin e EMPACT për armët e zjarrit.