Eurodeputetja Fajon e zhgënjyer me Shqipërinë

Deputetja e Parlamentit Europian, Tanja Fajon, ka shpreh mendimet e saj lidhur me përpjekjet e Shqipërisë në rrugën drejt integrimit evropian.

Ajo është shprehur e zhgënjyer për kohën e që Shqipëria ka humbur, sipas saj, në rrugën e integrimit dhe këshillon palët politike të përmbushin reformat.

“Fatkeqësisht Shqipëria po humbet vazhdimisht kohë të çmuar në rrugën e saj drejt integrimit Evropian. Shpesh zhgënjehem duke parë ‘bllokimet’ politike midis qeverisë dhe opozitës. Është e rëndësishme të kesh dialog; të bisedosh me njëri tjetrin për të mirën e vendit. Qytetarët e meritojnë këtë”, ka deklaruar ajo.

Kjo kohë e humbur, sipas saj, duhet të kompensohet në një farë mënyre.

“Reformat duhet të plotësohen. E vetmja perspektivë e Shqipërisë është Bashkimi Evropian. Kështu që për hatër të brezit të ri, dëshiroj ta shikoj vendin tuaj të ecë përpara me një hap më të shpejtë dhe kjo është përgjegjësi e politikanëve të këtij vendi. Është një vit elektoral dhe si i tillë do të jetë një provë tjetër që do të testojë maturimin e Shqipërisë”, ka deklaruar Fajon.

Në lidhje me dorëzimin e Planit të Veprimit nga qeveria shqiptare, Fajon u shpreh se koha do ta tregojë se sa serioz është ky angazhim, ndërsa pohon se është pesimiste për marrjen e statusit këtë vit./bw&albinfo/