Veriu i Shqipërisë bllokohet nga bora

Përveç përmbytjeve në zonën jugore në atë veriore, Shqipëria po përballet me reshjet e borës. Gjatë ditës së sotme në të gjithë territorin e Qarkut të Shkodrës po vazhdojnë reshjet e dëborës në zonat malore, transmeton albinfo.ch.

Në këtë zonë është bllokuar segmenti rrugor Qafë-Thore, ku bora ka arritur deri në 50 centimetra. Po ashtu nga bora kanë mbetur të bllokuar edhe rrugët: Selcë – Vermosh, Shosh-Shalë, Qafa Shllak-Qafë Mali.

Policia njofton se përveç këtyre rrugëve që janë bllokuar janë dëmtuar disa ura këmbësore, si në fshatrat Berishë Vendi, Berishë Vogël, Levoshë-Ludricë të Njësisë Administrative Iballë, dy ura këmbësore në fshatin Sakatë, Njësia Administrative Blerim, janë dëmtuar dy ura këmbësore në  fshati Aprrip Guri, Njësia Administrative Fierzë, një urë këmbësore në lagjen Bardhet, një urë këmbësore në fshatin Lumbardhë, një urë këmbësore në fshatin Orosh dhe një urë këmbësore që lidh fshatrat Armiraj e Sërriqe Njësia Administrative Qafë-Mali.