Nxënësit zviceranë (pak) më të mirë sipas PISA-s

Në mesin e 34 vendeve të OECD-së, me të cilat është kryer ky hulumtim, nxënësit zviceranë kanë zënë vendin e 11, me 500 pikë të grumbulluara

Një hulumtim i bërë nga PISA ka nxjerrë nxënësit zviceranë pak më të mirë në lexim krahasuar me hulumtimin e fundit. Në mesin e 34 vendeve të OECD-së, me nxënësit e të cilave është kryer ky hulumtim, nxënësit zviceranë kanë zënë vendin e 11.

Kjo përbën një ngritje të vogë, për gjithsej 3 pikë, në krahasim me hulumtimin e njëjtë, të bërë në vitin 2000. Në vitin e përmendur, nxënësit zviceranë zinin vetëm vendin e 17 sa i përket kompetencës së tyre në të lexuar.

Sidoqoftë, me 500 pikët e tubuara nxënësit zviceranë janë pak mbi mesataren e OECD-së që është 480 pikë dhe më mirë se bashkëmoshatarët e tyre gjermanë.

Me 540 pikë të grumbulluara, Koreja e Jugut i ka marrë vendin e parë Finlandës, që e kishte merituar në hulumtimin e mëparshëm. Në projekt kanë marrë pjesë rreth 470.000 nxënës të moshës 15 vjeçare nga 34 vendet e OECD-së, ku hyjnë vendet me zhvillim të lartë ekonomik.

Ashtu si dhe më parë, vajzat dalin më të suksesshme në aftësinë për të lexuar qartë në krahasim me moshatarët e tyre të gjinisë së kundërt.