Agresiviteti i fëmijëve, si pasojë e prindërve

A është fëmija juaj agresiv? Nëse është më i madh se gjashtëvjeçar, mund të jeni ju fajtor, thonë shkencëtarët.

Hulumtuesit e Universitetit të Montrealit kanë studiuar qindra binjakë të rinj për të parë nëse origjina e agresivitetit është natyrale apo e përfituar.

Gjetjet e tyre ishin interesante. Deri në moshën gjashtëvjeçare, sjelljet agresive duket se janë për shkak të faktorit gjenetik. Por pas kësaj, ndryshimet në nivelin e agresivitetit – për mirë apo për keq – duket se ndikohen shumicën e kohës nga faktorët tjerë dhe jo gjenet.

“Shumë shpesh ne harrojmë se agresiviteti është pjesë fundamentale e zhvillimit shoqëror të fëmijës. Me rritjen e fëmijëve, ata mësojnë si t’i menaxhojnë emocionet e tyre, si të komunikojnë me të tjerët dhe si të përballen me konfliktet”, ka thënë Stephane Paquin, bashkëautore e studimit, transmeton Albinfo.ch.

Ambienti rreth tyre luan rol të madh se si fëmijët përballen me këto ndjenja, kanë shpjeguar hulumtuesit.

Ata po ashtu kanë njoftuar se po planifikojnë një studim të ri për të specifikuar shkaktarët social që ndikojnë në sjelljet agresive.