BE-ja lufton krimin ekonomik

Zyra e Bashkimit Europian ka filluar projektin për luftimin e krimit ekonomik në Kosovë. Për këtë ka marrë edhe përkrahjen nga qeveria e Kosovës. “Projekti është fillim i një ushtrimi shumë të fuqishëm që tregon bashkëpunimin mes Bashkimit Europian e qeverisë së Kosovës për të luftuar krimin ekonomik”, ka deklaruar shefi i Zyrës së Bashkimit Evropian për Kosovën, Samuel Zhbogar.

Zhbogar ka theksuar rëndësinë e përkrahjes nga qeveria e vendit.

“Çështjet e këtij vlerësimi janë shumë teknike, por përkrahja që na duhet është politike prandaj jam shumë i lumtur që sot po shohë praninë e përfaqësuesve shumë të lartë të qeverisë së Kosovës dhe të institucioneve tjera të rëndësishme”, ka thënë Zhbogar.

Zëvendëskryeministri Hajredin Kuçi, ka mbështetur këtë projekt i cili sipas tij, ka rëndësi të madhe. “Në emër të Qeverisë mirëpres fuqishëm projektin e juaj i cili besoj se do të kontribuoj fuqishëm në luftimin e kriminalitetit më lejoni gjithashtu se qeveria e Kosovës do të jetë e hapur dhe e angazhuar në këtë proces”, ka deklaruar ai.

“Mosluftimi i krimit do t’i sjell shumë probleme vendit” ka thënë ministrja për integrime europiane Vlora Çitaku. Sivjet do të bëhen dy vlerësime, në fushën e korrupsionit dhe të pastrimit të parave.