Federata kërkon infrastrukturë më të mirë për futboll në vitin 2018

Fadil Vokrri: “Synimet tona të përbashkëta u arritën duke shijuar arenën ndërkombëtare dhe filluam një përmirësim të infrastrukturës që besoj se do të vazhdojë edhe në vitin që vjen”

Kryetari i Federatës së Futbollit të Kosovës, Fadil Vokrri, përmes urimit për Vitin e Ri 2018 ka folur për synimet për vitin e ardhshëm dhe punët e kryera më 2017.

Sipas Vokrrit, viti 2017 ishte i mbushur me plot aktivitete të futbollit si në rrafshin kombëtar edhe në atë ndërkombëtar.

“Synimet tona të përbashkëta u arritën duke shijuar arenën ndërkombëtare dhe filluam një përmirësim të infrastrukturës që besoj se do të vazhdojë edhe në vitin që vjen”, ka thënë ai në letrën e urimit, transmeton Albinfo.ch.

Në urimin e tij ai ka shprehur bindjen se edhe në vitin 2018 federata do të punojë më shumë për përparimin e futbollit të Kosovës.

“Do të shtojmë angazhimin tonë brenda dhe do të rrisim cilësinë e ekipeve përfaqësuese në mënyrë që të arrijmë suksese që më në fund edhe futbollistët tanë të prekin e shijojnë evenimentet botërore. Por, të gjitha këto kërkojnë një infrastrukturë më të mirë e që besoj se me punën e përbashkët dhe mbështetjen e organeve shtetërore ky qëllim do të përmbushet në vitin që vjen”, ka shkruar ai.