Gjatë vitit të kaluar Gjermania ka lëshuar 3500 viza pune për shqiptarët

Në Qendrën Goethe të gjermanishtes në Tiranë, partnere e Institutit Goethe, është rritur me ritme të shpejta kërkesa për të mësuar gjuhën gjermane

Ambasada gjermane në Tiranë gjatë vitit të kaluar ka dhënë viza pune për 3.500 qytetarë nga Shqipëria. Shteti gjerman duket se është vendi më i preferuar për rininë e Shqipërisë, e sidomos ata të diplomuar në mjekësi.

Në Qendrën Goethe të gjermanishtes në Tiranë, partnere e Institutit Goethe, është rritur me ritme të shpejta kërkesa për të mësuar gjuhën gjermane.

Drejtoresha e kësaj qendre, Petra Behlke-Campos, ka thënë për DW se numri i kursantëve është dyfishuar që nga viti 2013 , kurse numri i pjesëmarrësve në provime është trefishuar.

Ligji gjerman, që hyri në fuqi në janar të vitit 2016, sipas të cilit qytetarët e vendeve të Ballkanit Perëndimor mund të marrin leje qëndrimi për të punuar dhe jetuar legalisht në Gjermani, nëse kanë një kontratë pune me një kompani private apo strukturë publike, hapi mundësi të mëdha për të emigruar në Gjermani. Efekti i tij i menjëhershëm është rritja e jashtëzakonshme e kërkesave për të mësuar gjermanishten si një parakusht për të siguruar një kontratë pune.

Ligji i sipërpërmendur, i shoqëruar me njoftime në mediat gjermane për vende të lira pune, sidomos për mjekë dhe infermierë, po ushqejnë te rinia shqiptare e diplomuar në mjekësi dëshirën për të emigruar dhe punuar në Gjermani.

Johan Haviari nga Tirana është diplomuar në Universitetin katolik “Zoja e Këshillit të Mirë” dhe ka studiuar atje për 6 vjet. “Pres të jap provimin e gjuhës gjermane në janar dhe të aplikoj për të bërë specializimin në kirurgji të përgjithshme në Këln. Për mua sistemi shëndetësor në Shqipëri është i pareformuar”, ka thënë ajo.