Në fshatin skocez Wigtown mundësohet pushimi dhe puna

Një librari në fshatin piktoresk Wigtown, në jug të Skocisë, ka një ofertë speciale, i fton turistët që të qëndrojnë në këtë fshat dhe të punojnë sikurse libërshitës deri në dy javë, nëpërmes ueb-faqes Air BnB.

Ideja është dëshmuar të jetë aq e popullarizuar saqë libraria Open Book ka rezervime për tre vjetët e ardhshme.  Alison Drury, e cila punon aktualisht në librari, tha se miqtë e saj ia kanë shumë zili për mënyrën se si ajo po e kalon pushimin, përcjell albinfo.ch.

E mysafirët që vijnë këtu qëndrojnë në banesën mbi librari dhe kanë në shfrytëzim edhe biçikletat me të cilat mund të eksplorojnë më shumë rrethinën.

Ata përkrahen nga një ekip vullnetarësh dhe kanë mundësi të marrin pjesë në aktivitete të ndryshme, si leximi i librave apo të tjera.  Bashkëthemeluesja e projektit Open Book, Jessica Fox, tha se qëndrimi në librari është realitet i vërtetë virtual, e që u mundëson mysafirëve të përjetojnë fantazinë e posedimit të një librarie në një qytet bregdetar. Wigtown, i cili në total ka 14 librari dhe rreth 900 banorë, në vitin 1998 u shpall “Qyteti kombëtar i librit” në Skoci.