Shqiptarët dhe boshnjakët pa viza edhe në Zvicër

Nga 15 dhjetori shtetasit e Shqipërisë dhe të Bosnjës munden të hyjnë në zonën e lirë të Shengenit dhe rrjedhimisht, edhe në Zvicër

Duke filluar nga 15 dhjetori shtetasit e Shqipërisë dhe të Bosnjës munden të hyjnë në zonën e lirë të Shengenit dhe rrjedhimisht, edhe në Zvicër, ka njoftuar sot Qeveria Federale e Zvicrës. Parlamenti Evropian dhe Këshilli i Unionit Evropian kanë vendosur më 24 nëntor lirimin nga detyrimi i vizës për qytetarët e Shqipërisë dhe Bosnjës e Hercegovinës. Edhe Zvicrën, si shtet anëtar të Shengenit e obligon ky vendim.

Qytetarët e vendeve të përmendura do të kenë të drejtë qëndrimi deri në tre muaj në këtë zonë. Me këtë rast ata nuk do të kenë të drejtë pune.

Një të drejtë shumë të kufizuar për punë e kanë tashmë qytetarët e vendeve të përmendura. Ajo vlen vetëm për personat me kualifikime të larta dhe për profesione për të cilat mbretëron mungesë në tregun e punës në Bashkimin Evropian dhe në vendet e EFTA-s.