Gjermania ndërpret linjat hekurudhore për shkak të stuhisë “Friederike”

Trenat, për shkaqe sigurie nuk do të mund të qarkullojnë më, ka thënë pasditen e sotme një zëdhënës i DB për emdiet gjermame

Keystone

Ndërmarrja Hekurudhore e Gjermanisë (DB) ka ndërprerë pasditen e të enjtes gjithë qarkullimin hekurudhor i linjave të gjata në vend dhe atyre ndërkombëtare. Shkak për këtë masë drastike ka qenë stuhia e fuqishme “Friederike” e cila e ka goditur rëndë një pjesë të madhe të Gjermanisë. Trenat, për shkaqe sigurie nuk do të mund të qarkullojnë më, ka thënë pasditen e sotme një zëdhënës i DB për emdiet gjermame.

Trenat që ende ishin në rrugë, në momentin e marrjes së vendimit, duhej që, po qe e mundur, të shkojnë deri në stacionet për ku janë nisur. Në landet si: Nordrhein-Westfalen, Nedersachsen, Thüringen, Sachsen dhe Sachsen-Anhalt është ndërprerë edhe qarkullimi i trenave regjionalë.

Nga ana tjetër në SBB (Ndërmarrja e Hekurudhave e Zvicrës) thonë se në qarkullimin hekurudhor brenda Zvicrës nuk pritet të ketë pengesa të mëdha, transmeton albinfo.ch. Ndërsa për linjat ndërkombëtare do të angazhohen trena rezervë që do t`i marrin udhëztarët nga kufiri i vendit e deri në caqet brenda Zvicrës.

Stuhie “Friederike” e cila po bën kërdinë në  disa vende të Evropës Perëndimore, deri tash ka marrë jetën e 7 personave. 4 prej tyre në Gjermani, nga 1 në Itali, Holandë dhe në Belgjikë. Shumica e tyre  kanë vdekur si pasojë e rrëzimit të drurëve nga fuqia e stuhisë.