Komisioni parlamentar voton për lejimin e përgjimit të invalidëve të dyshimtë

Por, për të pasur të drejtë përgjimi, detektivët socialë duhet paraprakisht të kenë një leje nga gjyqtari përkatës

Detektivët socialë, në rastet kur dyshojnë me bazë se ndonjë përfitues i pensionit të invaliditetit, e shfrytëzon atë pa të drejtë, kanë të drejtë ta përgjojnë atë, shkruan SDA. Kështu ka vendosur Komisioni për çështje sociale i Dhomës Nacionale të Parlamentit të Zvicrës, transmeton albinfo.ch Pro kanë votuar 16 ndërsa, kundër, 9 anëtarë.

Por, për të pasur të drejtë përgjimi, detektivët e përmendur duhet paraprakisht të kenë një leje nga gjyqtari përkatës.

Ndërkaq ndryshe mendon dhoma tjetër parlamentare, ajo e kantoneve. Sipas kësaj të fundit, pëlqimi i gjyqtarit do të nevojitet vetëm për vendosjen e antenave GPS për përgjim.

Këshilli Federal në një vendim të marrë kohë më parë nuk kishte pranuar instalimin e instrumenteve për identifikim të vendndodhjes (si antenat GPS) pasi që kjo do të përbënte shkelje të parimit për mbrojtjen e personalitetit gjegjësisht privatësisë.

Me çështjen e vëzhgimit ose përgjimit të pensionistëve të invaliditetit do të merret edhe Dhoma Nacionale e Parlamentit.