Protesta e artistit Driton Selmani, ndërron flamurin “Te rrethi” në Prishtinë

Ai thotë se flamuri kombëtar u zëvendësua me flamurin, i cili përdoret në futboll për simbolizimin e 'pozitës jashtë loje' ose 'ofsajd'

Flamuri kombëtar, i cili gjendej në rrethin kryesor në hyrje të Prishtinës, është ndërruar me një tjetër flamur. Drejtori i Inspektoratit në Komunën e Prishtinës, Brahim Mehmetaj, ka thënë se artisti nuk ka marrë leje për zhvendosjen e flamurit. Ai ka theksuar se ata nuk e dinë kuptimin e tij.

Mehmetaj ka thënë se personi dhe kompania që e kanë vendosur këtë flamur, do të ndëshkohen nga Komuna. Por, autori i tij, artisti Driton Selmani, ka thënë se ka nisur një lloj projekti, dhe se ky ndërrim i këtij flamuri, ka qenë i pritur.

Ai thotë se flamuri kombëtar u zëvendësua me flamurin, i cili përdoret në futboll për simbolizimin e ‘pozitës jashtë loje’ ose ‘ofsajd’. Projekti i tij i quajtur “Red Tape”, sipas Selmanit, është reflektim mbi mënyrën e përdorimit të flamujve si mjete për të prekur nervat kulturore, politike dhe sociale.

Kryetari i Prishtinës, Shpend Ahmeti, me të kuptuar edhe arsyen e vendosjes së këtij flamuri, tha se i vjen mirë që protestën për problemet në vend, një artist e tha në këtë mënyrë.