Ministrja Reshitaj, e shqetësuar për gjendjen e ndotjes së ajrit

"Në të kaluarën realiteti i ndotjes së ajrit edhe është demantuar. Ne nuk e mohojmë atë, përkundrazi e potencojmë dhe luftojmë ta bëjmë prioritet edhe institucional edhe shoqëror"

Ministrja e Ambientit, Albena Reshitaj ka dhënë qëndrimin e saj rreth shifrave alarmante të ndotjes së ajrit. Reshitaj ka pranuar se është e shqetësuar ndaj shifrave të publikuara megjithatë ajo nuk ka dhënë ndonjë zgjidhje të shpejtë konkrete se si të bëhet ndalimi i ndotjes së ambientit në Prishtinë.

“Ju të gjithë e dini që gjerat nuk zgjidhen me shkop magjik, e aq më pak në vendin tonë ku problemet janë të shtresuara e të trashëguara.

Në të kaluarën realiteti i ndotjes së ajrit edhe është demantuar. Ne nuk e mohojmë atë, përkundrazi e potencojmë dhe luftojmë ta bëjmë prioritet edhe institucional edhe shoqëror. Për të pasur përmirësim të ndotjes së ajrit ne kemi kërkuar nga institucionet përkatëse që të realizojnë përgjegjësitë e tyre ligjore që kanë, disa prej të cilëve veçse kanë filluar masat konkrete.

1. Zbatimi i Udhëzimit Administrativ që obligon Ministrinë e Infrastrukturës që të mos lejojë regjistrimin e veturave që tejkalojnë normat e lejuara të shkarkimeve në ajër;
2. Kontrollimi i cilësisë së derivateve të naftës që importohen në Kosovë;
3. Ndërtimi i Unazës së brendshme të kryeqytetit dhe zhvendosja e administratës shtetërore në Hajvali;
4. Zgjerimi i sistemit të kogjenerimit;
5. Ndërtimi i Termocentralit “Kosova e Re”, me filtrat e teknologjisë së fundit me kërkesën time;
6. Krijimi i zonave të reja të gjelbra etj.

Të gjithë këto masa do të ndikojnë në reduktimin e ndotjes së ajrit”, ka thënë ajo.