Komuna e Prishtinës sqaron terminët në Qendra të Mjekësisë Familjare

“Edhe në të ardhmen, rastet urgjente do të trajtohen me përparësi pa caktuar termin, por edhe rastet e tjera do të marrin shërbimin, pavarësisht nëse kanë caktuar termin ose jo”

Drejtoria e Shëndetësisë në Komunën e Prishtinës ka sqaruar qytetarët lidhur me projektin e nisur për caktimin e terminëve për vizita kontrolluese në Qendra të Mjekësisë Familjare.  Komuna thotë se kjo po bëhet me qëllim të lehtësimit të qasjes së qytetarëve në shërbime shëndetësore, si dhe që mjeku të ketë kohë të mjaftueshme ta ekzaminojë në mënyrë adekuate secilin pacient.

“Ky pilot-projekt është për vizitat kontrolluese (të radhës, pas vizitës së parë), si dhe për pacientët që dëshirojnë të shmangin radhën e pritjes”, thuhet në sqarim. Aty theksohet se pilot projekti do të zgjasë deri në muajin prill dhe pas rekomandimeve nga grupi punues, si dhe ankesat e sugjerimet e qytetarëve, do të fillojmë me fushatë vetëdijesuese nga muaji maj.

Komuna njofton qytetarët se gjatë këtij pilot-projekti asnjë rast nuk do të kthehet pa marrë shërbimin shëndetësor. “Edhe në të ardhmen, rastet urgjente do të trajtohen me përparësi pa caktuar termin, por edhe rastet e tjera do të marrin shërbimin, pavarësisht nëse kanë caktuar termin ose jo”, theksohet në njoftimin sqarues.