Gjenden të vrarë burrë e grua dhe një fëmijë 4 vjeçar

Medie të ndryshme shkruajnë se fëmija ishte nipi i gruas tashmë të vrarë ndërsa vrasësi është kryefamiljari 77 vjeçar

Në një banesë në qytetin Spreitenbach (Kantoni Aargau) sot në mëngjes janë gjetur trupat e pajetë të dy të rriturve dhe një fëmije. Siç bën të ditur policia, fjala është për viktima të një akti kriminal, vrasjeje të trefishtë, shkruan sda.ch.

Në mesin e viktimave është një çift, burri 77 dhe gruaja 55 vjeçare si dhe një djalë i vogël 4 vjeçar, transmeton albinfo.ch. Çifti jetonte në banesën në fjalë ndërsa fëmija ishte nga rrethi familjar i çiftit.

Medie të ndryshme shkruajnë se fëmija ishte nipi i gruas tashmë të vrarë ndërsa vrasësi është kryefamiljari 77 vjeçar. Po ashtu ato shkruajnë se vrasja e fëmijës dhe gruas është bërë me thikë, duke i therur në qafë.

Burri 77 vjeçar ka qenë shtetas zviceran ndërsa gruaja dhe fëmija, me shtetësi peruane.

Bazuar në gjendjen aktuale të informacioneve që ka policia, në këtë krim nuk ka pjesëmarrës tjerë. Ndërsa në banesë është gjetur një armë zjarri.