Nga projekti “Pro tax 2” Kosova përfiton 3.2 milionë euro

Ministri Hamza konsideroi se ky projekt është një nga më të suksesshmit e Ministrisë së Financave

Ministri i Financave, Bedri Hamza dhe i ngarkuari me punën e ambasadorit të Suedisë në Kosovë, Anders Wollter, firmosën marrëveshjen për vazhdimin e mbështetjes financiare për projektin për vazhdimin e përmirësimit të sistemit të tatimit në pronë “Pro Tax 2”, në një shumë prej 3.2 milionë eurosh.

Ministri Hamza konsideroi se ky projekt është një nga më të suksesshmit e Ministrisë së Financave. Ai theksoi se po ashtu edhe reforma e ndërmarrë së fundmi në fushën e tatimit në pronë është një nga reformat më të rëndësishme për komunat.

Ndërsa, i ngarkuari me punën e ambasadorit të Suedisë në Kosovë, Anders Wollter, falënderoi ministrin Hamza për zotimin dhe angazhimin në implementimin e marrëveshjeve me shtetin suedez.