Përdorimi i rrjeteve sociale, burim financimi për kompani inovative

Ministri i Inovacionit dhe Ndërmarrësisë, Besim Beqaj, ka vizituar kompaninë “Hallakate”, në vazhdën e takimeve në kompanitë që merren me ofrimin e shërbimeve digjitale. Këto vizita po bëhen me qëllim të bashkëpunimit me këtë sektor të rëndësishëm ekonomik.

Gjatë bashkëbisedimit me pronarin e kësaj kompanie, Valon Canhasi, ministri Beqaj ka theksuar rëndësinë që ka përkrahja e këtij sektori në aspektin e rregullimit ligjor të fushës së inovacionit.

Beqaj ka thënë se kjo ministri që nga themelimi është angazhuar në rregullimin ligjor të kësaj fushe, duke përmendur themelimin e Këshillit për Inovacion dhe Ndërmarrësi, nisjen e hartimit të Strategjisë Kombëtare për Inovacion dhe Ndërmarrësi, si dhe hartimin e Ligjit për Inovacion dhe Ndërmarrësi, që do të fillojë së shpejti. Ministri Besim Beqaj ka folur edhe për fondin për inovacion dhe ndërmarrësi që do të fillojë të ndahet së shpejti.

Ndërsa Canhasi e ka informuar ministrin Beqaj për sukseset e shpejta të kompanisë “Hallakate” në fushën e ofrimit të shërbimeve digjitale për kompani të mëdha të Kosovës.