Apostolova thotë se nuk duhet të jepen data për liberalizimin e vizave

Ajo ka thënë se nuk ka rrugë të shkurtër për anëtarësim, po se duhet të ketë një proces transformues të vështirë

Shefja e Zyrës së BE-së në Prishtinë, Nataliya Apostolova, ka thënë se nuk është e drejtë të jepen data për liberalizimin e vizave. Ajo theksoi se liberalizimi varet nga Kosova se sa do ta luftojë krimin dhe korrupsionin. Ndërsa ka theksuar se ratifikimi i demarkacionit ka përshpejtuar rrugën e Kosovës për në BE.

Në konferencën e organizuar nga ministria e Integrimit Evropian me temën “Kosova, Presidenca e Këshillit të BE-së dhe Strategjia e re e Ballkanit Perëndimor – Çka mund të presim”, ajo ka thënë se nuk ka rrugë të shkurtër për anëtarësim, po se duhet të ketë një proces transformues të vështirë.

Apostolova edhe një herë ka ripërsëritur se reforma më e madhe për Kosovën duhet të bëhet në forcimin e sundimit të ligjit.

Ndërsa ministrja Dhurata Hoxha deklaroi se Serbia nuk mund të jetë pjesë e BE-së pa normalizuar marrëdhëniet me Kosovën. Ajo shtoi se strategjia e BE-së ka konfirmuar se Kosova ka rrugën e ndarë nga Serbia sa i përket integrimit në BE.