KOSST-i kërkon edhe 1 milion euro për borxhlinjtë në veri

Gjatë raportimit para Komisionit për zhvillim ekonomik, Arsim Janova, kryetar i bordit të ZRRE-së, ka thënë se Kosova vazhdimisht e ka furnizuar veriun me rrymë, por atje funksionon një kompani ilegale

Operatori i Sistemit, Transmisionit dhe Tregut-KOSTT, i ka kërkuar sërish Qeverisë së Kosovës edhe një milion euro të tjera për të mbuluar humbjet e energjisë elektrike në veri të vendit.

Këto mjete do të vlejnë vetëm për muajin prill. Gjatë raportimit para Komisionit për zhvillim ekonomik, Arsim Janova, kryetar i bordit të ZRRE-së, ka thënë se Kosova vazhdimisht e ka furnizuar veriun me rrymë, por atje funksionon një kompani ilegale që mirëmban rrjetin dhe që u dërgon qytetarëve të asaj pjese fatura të energjisë. Mirëpo, me këto konstatime nuk është pajtuar anëtarja e këtij komisioni, Duda Balje.

Ajo ka thënë se në veri funksionojnë dy kompani dhe se, sipas të dhënave që i ka siguruara, një pjesë e banorëve ia paguajnë energjinë e shpenzuar kompanisë serbe. Ajo ka kritikuar ZRRE-në se kanë shkelur për vite të tëra të drejtat e njeriut, duke i detyruar të gjitha qytetarët të paguajnë për shpenzimin e energjisë në atë pjesë.