Qytetarët e Cyrihut, më “të mençurit”, ata të Höfe-s, më të pasurit

Fare në majë sa i përket fuqisë blerëse është qarku i vogël, i njohur si "oaz tatimor",  Höfe në Kantonin Schwyz, i cili ka “kuletën më të trashë” në gjithë Zvicrën, gjegjësisht fuqia blerëse e banorit mesatar të tij është afër 88 mijë euro

Cyrihu me rrethinën e tij ka mesataren më të lartë në gjithë Zvicrën  sa i takon nivelit të shkollimit që kanë banorët e tij. Madje qarku administrativ i Cyrihut është i vetmi në Zvicër ku një shumicë e banorëve kanë të mbaruar shkollimin e lartë, bëhet e ditur në statistikën më të re, të publikuar të mërkurën nga Zyra Federale për Statistikë (BFS), shkruan sda.ch.

Me fjalë tjera, 51 për qind e banorëve të moshës mbi 25 vjeçare në këtë qark kanë absolvuar me sukses një fakultet ose një shkollë të lartë, transmeton albinfo.ch. Menjëherë pas Cyrihut vjen qarku i Meilenit, i cili po ashtu bën pjesë në Kantonin e Cyrihut, me 49 % qytetarë akademikë në popullatën e tij të gjithmbarshme.

Por Qarku i Meilenit ka fuqinë blerëse më të lartën në kanton e më gjerë, gjegjësisht 62.000 euro për kokë banori, përcjell albinfo.ch. Ndërkohë që qarku i Cyrihut në këtë listë është vetëm i 14-ti.

Ndërsa fare në majë është qarku i vogël, i njohur si “oaz tatimor”,  Höfe në Kantonin Schwyz, i cili ka “kuletën më të trashë” në gjithë Zvicrën, gjegjësisht fuqia blerëse e banorit mesatar të tij është afër 88 mijë euro.

Në vendin e tretë sa i përket arsimimit vijnë dy qarqe të Kantonit Vaud, Nyon dhe Lavaux-Oron, me nga 48% secili.