Aeroplani zviceran detyrohet të sillet 5 orë në ajër para se të aterrojë

Pasi që para aterrimit në Kloten atij i duhej të digjte gjithë kerozinën që e kishte në rezervoar, ai është sjellë në rreth për pesë orë në ajër  para se të aterronte në mënyrë të sigurt

Një aeroplan i Kompanisë Swiss  që ishte nisur mbrëmë rrugës së tij nga Aeroporti i Cyrihut (Kloten) drejt Nju Jorkut është detyruar të ndërronte drejtimin pak pas nisjes. Piloti i fluturimit LX18 kishte parë se kishte një problem në motorin e majtë prandaj nuk kishte dashur të rrezikonte që në një gjendje të tillë të fluturonte mbi Atlantik, njofton flightradar24.

Kështu, diku në hapësirën ajrore mbi Bazel, ai kishte vendosur të kthehej prej nga ishte nisur. Por pasi që para aterrimit në Kloten atij i duhej të digjte gjithë kerozinën që e kishte në rezervoar, ai është sjellë në rreth në ajër për pesë orë para se të aterronte në mënyrë të sigurt, transmeton albinfo.ch.

Gjatë këtyre pesë orëve të ankthshme për 220 pasagjerët dhe 12 pjesëtarët e personelit, fluturakja ka përshkuar disa  herë një hapësirë të gjerë ajrore, mbi Gjermaninë Jugore, pastaj mbi Bazel, mbi Kantonin Aargau për të mbërritur deri në hapësirën ajrore mbi Mynih.