Beqaj:Raporti i Martyt për ta prishur imazhin e Kosovës

Ministri kosovar për Integrim Evropian, Besim Beqaj, në deklaratë për televizionin zviceran, “TSR”, ka deklaruar se akuzat e raportuesit të Asamblesë Parlamentare të Këshillit të Evropës, Dick Marty, janë akuza të pavërteta dhe se janë të orkestruara nga Serbia.

“Është shume pikëlluese të dëgjosh se një diplomat i lartë, si Marty, lanson në emër të një institucioni zyrtare këso lloj akuzash të pavërteta. Ne jemi shumë të vetëdijshëm se këto thashetheme janë të orkestruara nga Serbia. Nuk janë fakte nëse dikush pohon se ka dëgjuar diçka.

Faktet duhen të përmbajnë elemente konkrete. Ky raport është planifikuar pikërisht në kohën e zgjedhjeve për ta prishur imazhin e Kosovës. Ne mirëpresim çfarëdo lloj hetimesh me një kusht që ato të jenë të mbështetura në fakte, kurse ata që ofrojnë pretendime të rrejshme duhet të përgjigjen përpara ligjit“, ka thënë ministri Beqaj.