Rama thotë se askush s’ka folur për ministrin Xhafaj

Kryeministri i Shqipërisë, Edi Rama nga foltorja e Kuvendit të Kuvendit, ka akuzuar opozitën se po bëjnë gjithçka të hedhin baltë tek ndërkombëtarët me qëllim të mos-hapjes së negociatave.

Rama i quajti “flamurtarë të padrejtësisë ndaj Shqipërisë”, përcjell albinfo.ch.

“Fakti është i njohur botërisht. Por fakti nuk është i njohur vetëm për të gjithë ata shqiptarë që e kanë pasur mendjen në atë moment kur ky fakt është shfaqur, sepse nuk janë të detyruar që ta kenë gjithmonë mendjen shqiptarët te gjithë kjo tollovi e madhe, por është e njohur edhe nga partnerët ndërkombëtarë. Dhe, nëse në këtë zurna do të kishte një grimcë të vërtete lidhur me përgjegjësi të çfarëdo natyre të ministrit tonë të Brendshëm, besoj se asnjë shqiptar nuk e quan të paarsyeshme bindjen time se përpara se të flasin këta, do të kishte folur miku ynë, protagonist i jetës sonë publike, ambasadori amerikan, do të kishte folur Bashkimi Evropian, do të kishin folur ata që nuk kanë lënë rast pa folur, pasi nuk kanë lënë rast pa verifikuar”, ka thënë ai.