Bie numri i të vrarëve me armë zjarri

Gjatë vitit 2008 në Zvicër nga të shtënat me armë zjarri kanë humbur jetën 259 persona, ndërsa një vit më parë ky numër ishte 291

Numri i të vrarëve nga armët e zjarrit ka shënuar një rënie të vazhdueshme viteve të fundit, njofton drs.ch. Kështu, sipas të dhënave të fundit të publikuara nga Enti Federal për Statistikë, gjatë vitit 2008 në Zvicër nga të shtënat me armë zjarri kanë humbur jetën 259 persona, dhe në shumicën dërmuese të rasteve (239) bëhej fjalë për vetëvrasje. Ndërsa një vit më parë ky numër ishte 291.

Shumica dërmuese e të vrarëve ose të vetëvrarëve nga armët e zjarrit ishin meshkuj. Vetëm 13 ishin femra.

Marrë në përgjithësi, në disa vitet e fundit, sipas këtij raporti, vrasjet me armë zjarri kanë shënuar një përgjysmim. Në vitin 1998 ishin shënuar 466 vrasje të tilla.

Këto të dhëna janë publikuar në prag të referendumit që do të mbahet më 13 shkurt mbi ndalimin e mbajtjes së armëve të shërbimit në shtëpi.