Sa refugjatë kalojnë përmes Shqipërisë?

Fotografitë e refugjatëve të lodhur nga rruga dhe të vendosur në ndonjë park për të pritur trafikuesit e radhës për t’i dërguar drejt Europës janë aktivizuar nëpër mediat austriake. Kjo pasi korridori i dikurshëm përmes Maqedonisë dhe Serbisë (i mbyllur në 2016) po zëvendësohet me atë nga Shqipëria, Mali i Zi dhe Bosnja, shkruan “Kleine Zeitung”.

“Nga qyteti lindor boshnjak Bihac, ata shpresojnë të shkojnë drejt Kroacisë, në afërsi të vendit shengen të Sllovenisë dhe më pas orientohen drejt Perëndimit,” përcjell albinfo.ch. “Vetëm në muajt e parë 2018 janë raportuar rritje të refugjatëve nga 600 deri 700 përind,” thotë ministri Dragan Mektić.

Në 2016 në Bosnjë erdhën 100 refugjatë, në 2017 kishte 700 të tillë, ndërsa vetëm në muajt e parë të këtij viti janë raportuar rreth 2000 refugjatë.

Kjo konfirmohet edhe nga ministria e brendshme sllovene për median tjetër austriake “Der Standard”. “Deri në 27 maj të këtij viti ilegalisht e kanë kaluar kufirin kroato-slloven 2105 persona, që është rreth tre herë më e madhe sesa periudha e njëjtë e vitit të kaluar,” tha zëdhënësja, Vesna Drole.

Por sipas po të njëjtës media, shumica e refugjatëve të shtuar kërkojnë strehim në Itali dhe jo në Austri, kurse shtimi i refugjatëve lidhet me përleshjet e fundit në rajonin e Kashmirit. Për këtë shumica e tyre janë pakistanezë.

Tensionuese nga media austriake është edhe rritja e refugjatëve të cilët kalojnë detin mes Turqisë dhe Greqisë, kur dihet se një pjesë e madhe e vendeve europiane nuk strehojnë më refugjatë.