Në luftën kundër pedofilisë, edhe me hetime të fshehura

Hetimi i fshehur për pedofili, deri në miratimin e një ligji, do të realizohet përmes rregulloreve të përkohshme

Në rastet e dyshuara për pedofili, policisë do t`i lejohet edhe më tutje të bëjë hetime të fshehura në internet. Kjo, me gjithë faktin se ende nuk ka mundur të arrihet një pajtim që të miratohet një ligj federal që do të rregullonte lëndën. Hetimi i fshehur do të realizohet përmes rregulloreve të përkohshme, kanë shpallur drejtorët për çështje policore dhe juridike të kantoneve zvicerane.

Veç kësaj, kantonet kanë edhe mundësinë për të krijuar një bazë ligjore për hetimet e fshehura. Kështu, një ligj i tillë tashmë është krijuar në kantonin Schwyz. Mirëpo, edhe në këtë rast, leja duhet të jepet vetëm nga gjykata.

Ndërkaq, drejtorët e policive kantonale janë shprehur se në një afat të mesëm, me ligjin e ri për policinë do të arrihet që hetimet e tilla të fshehura të natyrës preventive të mund të urdhërohen edhe drejtpërdrejtë nga policia.