Pagesa për Rrugën e Kombit nga 17 shtatori

Për banorët e Kukësit dhe transportin publik tarifa do të jetë 100 lekë, ndërsa për frekuentuesit e shpeshtë do të ketë ulje nga 10% deri në 40%

Pagesa për Rrugën e Kombit do të rinisë më 17 shtator. Burime të televizionit oranews nga grupi negociator ndërministror bëjnë me dije se për banorët e Kukësit dhe transportin publik tarifa do të jetë 100 lekë, ndërsa për frekuentuesit e shpeshtë do të ketë ulje nga 10% deri në 40% në varësi të numrit të kalimeve në një muaj.  

Ndërkohë që edhe për përdoruesit e shpeshtë është vendosur ulje e tarifës e cila do të përllogaritet në bazë të lëvizjeve që do të kryhen në një muaj.

Sa më shumë të udhëtojë një qytetar apo një biznes, aq më shumë ulje përfiton, e cila varion nga 10% në 40%.  Nga 10 deri në 30 kalime në muaj, përdoruesi i shpeshtë përfiton zbritje në masën 10%;  Mbi 30 deri në 50 kalime në muaj, përdoruesi i shpeshtë përfiton zbritje në masën 20%; Mbi 50 deri në 60 kalime në muaj, përdoruesi i shpeshtë përfiton zbritje në masën 30%; Mbi 60 kalime në muaj, përdoruesi i shpeshtë përfiton zbritje në masën 40%.

Tarifa në fillim ishte vendosur 5 euro për një drejtim por që pati reagime të mëdha sa që banorët e Kuksi në një protestë i shkatërruan kabinat për pagesa.