Zvicra favorite, pranojnë norvegjezët

Sonte në stadiumin Stade Suisse të Bernës luhet ndeshja kualifikuese për Kampionatin Botëror, në mes të Zvicrës dhe Norvegjisë. Dhe, sipas të gjitha parashikimeve, Zvicra ka përparësi në këtë ndeshje. “Zvicra, ekipi më i mirë në grup”. Kështu është shprehur askush më pak se një lojtar nga skuadra kundërshtare e Zvicrës në ndeshjen e sontme. Se Zvicra është më e mirë dhe se ajo sonte është favorite e qartë, ka thënë lojtari norvegjez i repartit të mbrojtjes, Brede Hangeland që luan për Fullhamin e Anglisë. “Është kombëtarja më e fortë në grup. Veç kësaj, Zvicra luan në shtëpi”, ka thënë ai. Ngjashëm është shprehur edhe futbollisti më i njohur i Norvegjisë jashtë vendit, John Arne Riise. “Një pikë e fituar do të mjaftonte për ne”. Riise për mediet zvicerane ka folur në superlativ edhe për Shaqirin. “Shaqiri është një ndër futbollistët më të mirë të Evropës”, ka thënë Riise, i cili për nga sektori që mbulon, ka detyrë të bllokojë pikërisht Shaqirin. Nga ana tjetër skandinavët mund të kenë një përparësi të lehtë në përgatitjen e tyre fizike për këtë ndeshje, shkruajnë mediet zvicerane. Për kombëtaren zvicerane do të luajnë në ekipin startues tre shqiptarë: Behrami, Xhaka dhe Shaqiri.