Sindikalistët alarmojnë për varfërim të familjeve me paga të ulëta

Një familje katër anëtarëshe aktualisht ka në dispozicion 1400 franga më pak në vit, në krahasim me gjendjen e vitit 2000

Federata e sindikatave zvicerane SGB, në konferencën vjetore të saj për medie ka alarmuar se dallimi në mes të të ardhurave në Zvicër po bëhet gjithnjë më i madh, shkruan tagesanzeiger.ch. 

Sipas përfaqësuesve të SGB-së, në dhjetë vitet e fundit është përkeqësuar edhe më tej gjendja financiare e familjeve me të ardhura të vogla dhe të mesme. Një familje katër anëtarëshe aktualisht ka në dispozicion 1400 franga më pak në vit, në krahasim me gjendjen e vitit 2000.

Kjo ka ardhur si rezultat i ngritjes së çmimeve të sigurimit shëndetësor dhe shtrenjtimit të banesave, zhvillime këto që, sipas sindikalistëve, nuk janë shoqëruar me ngritjen e pagave të punëtorëve.

E kundërta, sipas SGB-së ka ndodhur me ata që marrin paga më të mëdha. Përveç rritjes së mëtejme të pagave (të atyre që “peshojnë” mbi 200 mijë franga në vjet) të pasurit janë shpërblyer duke përfituar edhe nga zbritjet e tatimeve.