SGB me iniciativë për pagën minimale

Sipas propozimit të sindikalistëve, pagesa minimale nuk bën të jetë më e vogël se 22 franga për një orë pune

Duke filluar nga ky muaj, Federata e Sindikatave të Zvicrës (SGB) do të organizojë mbledhjen e nënshkrimeve për një iniciativë të re e cila do të vihej në referendum para popullit.

Fjala është për iniciativën e cila do të rregullojë me ligj pagën minimale në Zvicër. Sipas propozimit të sindikalistëve, pagesa minimale nuk bën të jetë më e vogël se 22 franga për një orë pune.

Më tutje, SGB, duke e parë si masë artificiale dhe të dëmshme forcimin e frangut kundrejt euros, kërkon që ndërmarrjet zvicerane të mbrohen nga dobësimi i vazhdueshëm i euros. Për të bërë këtë, sipas saj, duhet të veprojë Banka Nacionale e cila do të ndërpriste spekulimet me kursin e frangut.