Çmime tepër të larta për në Tiranë

634 dollarë kushton një biletë Frankfurt-Tiranë për vajtje më 5 gusht dhe kthimin më 12 gusht

Numri i lartë i emigrantëve që duan të kalojnë pushimet në Shqipëri, ka bërë që biletat vajtje-ardhje nga jashtë për në drejtim të Tiranës këtë verë të jenë shumë më të shtrenjta se anasjelltas.

E sigurisht shtetet që kanë numrin më të madh të emigranteve shqiptare kanë luhatjet më të mëdha, duke krijuar më shumë mundësi përfitimi për kompaninë ajrore që operojnë në Shqipëri që shfrytëzojnë konjukturën e tregut me konkurrencë të ulët në linja dhe mungesën e aeroporteve alternative në Shqipëri, raporton “TCH”.

Kështu kosto e udhëtimit në linjat nga aeroportet kryesore të Italisë, Roma dhe Milano janë gati dyfish më të larta se destinacioni i kundërt, përcjell albinfo.ch.

Sipas motorit të kërkimit ‘expedia’, çmimi i një bilete nga Milano për në Tiranë në datën 5 gusht dhe kthimin 12 gusht kushton 549 dollarë, ndërsa një bilete vajtje ardhje me të njëjtat data nga Rinasi për Milano kushton më shumë se dy herë më pak 260 dollarë.

Dyfish më shtrenjtë janë dhe biletat vajtje ardhje Romë-Tiranë, krahasuar me drejtimin e kundërt në të njëjtat data.

Edhe emigrantët nga Gjermania nëse do të nisen nga Frankfurti në drejtimin të Tiranës duhet t’i paguajnë çmimet e biletave rreth 50% me shtrenjtë.

634 dollarë kushton një bilete Frankfurt-Tiranë me vajtjen në 5 gusht dhe kthimin në 12 gusht, kurse e njëjta biletë në të njëjtat data, por me destinacion Tiranë-Frankfurt është rreth 200 dollarë më e lirë.

Më e shtrenjtë është edhe destinacioni tjetër Londra, sipas ‘expedia’, në 5 gusht nga kryeqyteti i Anglisë në drejtim të Tiranës mund të blesh një biletë-vajtje ardhje për 518 dollarë, ndërsa nga Tiranë për në Londër bileta që përfshin dhe kthimin kushton 430 dollarë.

Destinacioni grek është ai me luhatjen më të vogël me vetëm 30 euro, kjo pasi shumica e emigranteve preferojnë të vijnë drejt Shqipërisë në rrugë tokësore me automjet, duke bërë që avioni të jetë një zgjedhje e dytë.