Zharku arratiset, policia i vihet pas

Zëvendëskomandanti rajonal i policisë në Kaçanik, Basri Shabani ka thënë RTK-së se pas marrjes së urdhërarrestit, policia po bën kërkimet në terren për ta arrestuar Zharkun

Gjykata Komunale e Kaçanikut ka lëshuar një fletarrest kundër ish-prefekti komunal, Xhabir Zharku. Policia po i heton të gjitha vendet ku ai mund të jetë strehuar

Ish-kryetari i Komunës së Kaçanikut, Xhabir Zharku është arratisur prej shtëpisë së tij, në kohën kur ai është dashur të paraqitet në gjykatë për të vuajtur më pas dënimin me burg prej 3 vitesh. Kundër tij është lëshuar një fletarrest nga Gjykata Komunale e Kaçanikut, ndërsa policia po i heton të gjitha vendet e mundshme ku ai mund të jetë strehuar.

Zëvendëskomandanti rajonal i policisë në Kaçanik, Basri Shabani ka thënë RTK-së se pas marrjes së urdhërarrestit, policia po bën kërkimet në terren për ta arrestuar Zharkun.

Në maj të këtij viti Gjykata Supreme e kishte bërë të plotfuqishëm aktgjykimin e shkallës së parë me të cilin Zharku është i dënuar me tri vite burg nën akuzën për detyrim dhe armëmbajtje pa leje.

Zharku ka qenë komandant rajonal i UÇK-së, ndërsa në dy mandate pas luftës ka drejtuar Komunën e Kaçanikut. Ai është kryetari i dytë komunal që dënohet nga gjykata për vepra penale. Para tij është dënuar ish-kryetari i Ferizajt, Bajrush Xhemjali për shkaktimin e një aksidenti me pasoja fatale.

Të dy këta kryetarë janë detyruar ta ndërprenë në gjysmë mandatin, ndërsa ka qenë edhe kryetari aktual i Skenderajt, Sami Lushtaku i cili ka mbajtur tre muaj burg për kërcënimin e një prokurori. Ndryshe nga dy të parët, Lushtaku pas përfundimit të burgut, është kthyer sërish në krye të komunës.