Një tjetër atraksion turistik, restaurohet Kisha e Shën Mërisë në Bënjë

Në Përmet ka përfunduar restaurimi i Kishës së Shën Mërisë.

Pas shpalljes së fshatit Bënjë të Përmetit, Qendër Historike, ka përfunduar restaurimi i Kishës së Shën Mërisë.

Restaurimi i kishës është hapi i parë i ndërmarrë për zhvillimin e kësaj zone. Kisha e Shën Mërisë cilësohet si një monument kulture i kategorisë së I-rë, dhe është një objekt me vlera të veçanta, ndërtuar mes viteve 1789 dhe 1891.

Bënja është një vend me potenciale kulturore dhe natyrore të mëdha, ndaj meriton të jetë një ndër destinacionet turistike më të kërkuara në Përmet, shkruan Albinfo.ch.

Trashëgimia Kulturore dhe turizmi kulturor mbeten prioritetet e Ministrisë së Kulturës dhe Institutit të Monumenteve të Kulturës. Për këtë ka shkruar edhe kryeministri Edi Rama.

“Me këto pamje të Kishës së Shën Mërisë në Bënjë të Përmetit, vepër e fundshekullit XVIII me një model të rrallë arkitekturor, ku kanë përfunduar punimet restauruese pas shpalljes së këtij fshati Qendër Historike”, ka shkruar Rama në facebook.