Lunaçek: luftojeni korrupsionin nëse doni heqjen e vizave

Europarlamentarja Ulrike Lunaçek kërkoi nga kosovarët që të forcojnë luftën kundër korrupsionit dhe ryshfetit nëse duan heqjen e vizave me BE-në

Raportuesja për Kosovën në Parlamentin e Evropës, Ulirike Lunaçek iu ka bërë me dije institucioneve të Kosovës, se pa luftimin e korrupsionit dhe krimit të organizuar nuk do të ketë liberalizim të vizave për kosovarët në Bashkimin Evropian.

Në një intervistë dhënë RTK-së, Lunaçek, i cila konsiderohet mike e kosovarëve, kërkon që në vitin e ardhshëm Kosova të bëjë hapa konkret në luftën kundër korrupsionit dhe në forcim e rendit dhe ligjit.

“Do të theksoja dy gjëra: Të forcohet lufta kundër korrupsionit dhe ryshfetit dhe të forcohet i sundimi të ligjit. Kjo duhet të bëhet në të gjitha instancat: brenda Qeverisë dhe brenda institucioneve të Kosovës, por edhe brenda sistemit të arsimit, shëndetësisë etj:, konsideron Lunaçek.

Edhe nëse Kosovën e njohin pesë vendet e BE-së, prapë, sipas saj, problemet nuk do të zgjidhen.

“Jo, luftimi i korrupsionit është një detyrë që ju vetë duhet ta bëni, është për të mirën tuaj. Sfida dytë është zhvillimi ekonomik. Duhet të bëni më shumë në këtë drejtim, kjo për hatër të gjithë atyre të rinjve që presin një vend pune. Si një përfaqësuese e një partie të gjelbër do të thosha se duhet të bëni më shumë për energji të rinovueshme”, tha Lunaçek.

Europarlamentarja është përgjigjur edhe rreth platformës serbe për Kosovën, ku kërkohet nga Beogradi një autonomi e zgjeruar për serbët.

“Diçka si Republika Serbe në Kosovë nuk do të lejohet në as një mënyrë nga Bashkimi Evropian, kjo duhet të jetë e qartë. Do të thosha se veprimet që qeveria serbe bën jashtë procesit të dialogut për nevoja të konsumit të brendshëm politik nuk duhet të merren seriozisht”, tha ajo.

Në Serbi, sipas saj, ka njerëz që duan gjëra të tilla por ajo kërkoi që dialogut të përqendrohet në çështjet që zhvillohen brenda kornizavetë lejuara dhe jo të diskutohet për letrat pa vlerë si është platforma serbe.