Jo çdo fëmijë ulet sot në bankat e shkollës, mësimi privat me trend rritjeje

Në Austri këta nxënës quhen "Freilerner" ose "Unschooler" - ata qëndrojnë në shtëpi me prindërit, megjithatë nuk kanë detyra të përditshme, as planprograme të detajuara mësimore dhe qëllim konkret të arsimimit. Në fund ata duhet të testohen dhe marrin çertifikatën.

Jo çdo fëmijë ulet sot në bankat e shkollës. Gjithmonë e më tepër prindërit vendosin të tërheqin fëmijët nga shkollat publike dhe e zëvendësojnë atë me mësim privat. Kështu ndodh në shumë vende të Europës, ku detyrimi për të shkuar në shkollë mund të zëvendësohet me mësime shtëpiake ose shkolla private pa përmbushur të drejtën publike. Është një trend në rritje: në Austri gjatë pesë viteve të fundit ky grup është rritur me 500 nxënës të ri. Gjatë vitit shkollor 2017/18 ishin 2320 nxënës, ndërsa shifrat e këtij viti mungojnë. Në Austri këta nxënës quhen “Freilerner” ose “Unschooler” – ata qëndrojnë në shtëpi me prindërit, megjithatë nuk kanë detyra të përditshme, as planprograme të detajuara mësimore dhe qëllim konkret të arsimimit. Në fund ata duhet të testohen dhe marrin çertifikatën.

Kjo ka shtyrë në debat psikologët, nëse këta nxënës arrijnë të përshtaten në shoqëri dhe a mund të kultivojnë kulturën e debatit.

Disa prindër shfrytëzojnë ligjin për t’i mbajtur fëmijët në shtëpi në baza fetare, por ka edhe të tjerë që duan të mësojnë fëmijët sipas planprogramit të tyre dhe jo të asaj publike.

Vërejtje: Mësimet private në shtëpi, kanë qenë kulturë e familjeve të mëparshme aristokratesh në Perëndim, por edhe te bejlerët shqiptarë. Në “Kujtime”-t e Eqerem Bej Vlorës, autori tregon për mësimin privat që ka mësuar me mësues nga Stambolli, Italia dhe Austria.

---