Shqipëria ka ende shumë sfida për të rritur numrin e turistëve

Ministri i Turizmit dhe Mjedisit, Blendi Klosi, në një konferencë për media ka folur për vendimin e qeverisë për moslejimin e importit të veturave më të vjetra se 10 vjet si dhe për turizmin.

Ai tha se pavarësisht notave shumë optimiste që kanë marrë këtë vit në lidhje me sezonin turistik, vendi ka ende sfida për turizmin.

“Shqipëria sot gjendet në pozitën e saj më të favorshme pasi përfaqëson në mënyrë të përmbledhur atë çfarë sot është destinacioni më i kërkuar në botë. Na duhen politika të reja dhe standarde të reja. E dyta të përmirësojmë shërbimet. Jemi në një sezon të suksesshëm, por larg sezonit me të cilin duam të ballafaqohemi”, ka thënë ai.

Gjatë shtatorit, sipas Klosit, vendin tonë e vizituan rreth 610 mijë turistë me një rritje prej 30% krahasuar më 2017.

Ministri u shpreh i vendosur se vendimi për ndalimin e importit të veturave do të zbatohet.