Valoni përshëndetet nga „The Voice of Switzerland“

Megjithë vokalin e tij të vlerësuar lartë, juria nuk ka qenë shumë e bindur me paraqitjen e tij skenike

Këngëtari 32 vjeçar Valon Muhadri, me këngën “Stop and Stare” të “One Republic” nuk ka mundur të shkojë edhe një raund më tutje në garën “The voice of Switzerland”. Megjithë vokalin e tij të vlerësuar lartë, juria nuk ka qenë shumë e bindur nga prania e tij në skenë.

Valoni është shumë i gjallë dhe i këndshëm në prapaskenë por sapo ngjitej në skenë, ai dukej i introvertuar. Këtë vërejtje ia kishin drejtuar atij anëtarët e jurisë, të cilët ishin të gatshëm madje edhe të punonin me të për ta evituar këtë pengesë.

Sidoqoftë, ai edhe kësaj here në skenë doli si një “qingj i butë”, shprehen mediet zvicerane. Ndërsa njëri nga anëtarët e jurisë, marc Sway, duke e pëlqyer zërin e ngrohtë të shqiptarit me prejardhje nga Gjakova, i është drejtuar atij: “Kush ka një zë të tillë, nuk është i detyruar t`ua qëllojë të gjitha notave”.

Në fund, Valon Muhadri nga anëtarja e jurisë Stefanie Heinzmann mori 40 vota ndërkohë që rivalja e tij, Gabriela Grossenbacher, 60.

Edhe publiku televiziv iu përmbajt këtij vlerësimi, duke i dhënë këngëtares Grossenbacher më shumë vota se sa Valonit. Këtij të fundit mandej nuk i mbeti gjë tjetër pos të falënderonte me mirësjellje publikun dhe jurinë dhe të përshëndetej nga spektakli.