Shaqiri flet për ndeshjen që e pret në Beograd

Ai ka thënë se ka dëgjuar se do të pritet me fishkëllima në ndeshjen e kthimit, por nuk brengoset rreth këtij fakti

Ylli i futbollit shqiptar, Xherdan Shaqiri, zhvilloi një ndeshje shumë të mirë për Liverpoolin ndaj Yllit të Kuq në Ligën e Kampionëve. Skuadra angleze fitoi 4:0, derisa gjurmë la edhe futbollisti shqiptar, i cili e nisi ndeshjen nga fillimi, shkruan albinfo.ch.

Ai ka thënë se ka dëgjuar se do të pritet me fishkëllima në ndeshjen e kthimit, por nuk brengoset rreth këtij fakti.

“Unë kam parë disa artikuj në lidhje me këtë temë. Një lojtar ka thënë diçka në lidhje me këtë, por më të vërtetë mua nuk më intereson se çfarë thonë njerëzit.

Unë po shkoj atje për të luajtur futboll dhe nuk ka të bëjë fare me politikën. Asgjë tjetër nuk më intereson, unë po shkoj atje për ndeshje futbolli”, ka shtuar Shaqiri.

“Më ka ndodhur edhe në Kupën e Botës, por nuk paraqet asnjë problem”.

Pas ndeshjes Shaqirin e ka lavdëruar edhe trajneri i Liverpoolit, Jurgen Klopp. “Shaqiri ishte i përfshirë në çdo gjë, ai është një futbollist shumë i mirë. Ai ka punuar shumë në këtë ndeshje”, deklaroi trajneri gjerman.

Por, Shaqirin e lavdëroi edhe Rio Ferdinand, mbrojtësi i njohur, tashmë në cilësinë e analistit. “Xherdan Shaqiri meriton falënderime të veçanta sot (e mërkurë), ai është lojtar i ri në këtë skuadër, por ai ishte i shkëlqyeshëm. Jurgen Klopp punon shumë, ai përmirëson çdo lojtar që vjen përmes në klub”, tha Ferdinand.

---