Tirana kuqezi

Atmosfera festive ka nisur që të ndihet në Tiranë. Apelit të kreut të Bashkisë së Tiranës, Erion Veliaj, i janë përgjigjur me qindra familje në Tiranë.

Thuajse çdo pallat apo shtëpi private ka filluar të vishet me ngjyrat kombëtare dhe është vendosur edhe simboli ynë kombëtar, flamuri kuq e zi.

Festa e madhe e Pavarësisë pritet ta kthejë për të dytin vit radhazi sheshin “Skënderbej” në një pikëtakimi për të gjithë ata që ndihen patriotë, atdhedashës, e që e duan dhe e nderojnë tokën tonë, raporton “TCH”.

Sikurse është bërë tashmë traditë, me rastin e festive kombëtare Tirana mbledh qytetarë nga të gjitha qytetet e vendit, si dhe nga Kosova, Maqedonia dhe Mali i Zi, përcjell albinfo.ch.

Festimet do të kulmojnë me Natën e Bardhë, e cila rezervon një larmishmëri aktivitetesh në Tiranë.

Ekspozita, opera, filma, koncerte deri në orët e para të mëngjesit si dhe një super koncert me të ftuar specialë.

Të gjithë ndjehen të përshkuar nga një lloj entuziazmi dhe euforie, ku pa dyshim sundojnë dozat e krenarisë kombëtare.